அறிமுகப்படுத்தப்படவுள்ள புதிய காப்பீட்டு அட்டைக்கு இணங்க மேல் மாகாண போக்குவரத்து பொலிஸ் அதிகாரிகளுக்கு 500 டேப் கணினிகள்.

இந்நாட்டில் தனிநபர்கள் தங்களுடைய வாகனங்களுக்கு காப்பீட்டு நிறுவனங்களிடமிருந்து ஆண்டுதோறும் பெறும் பிளாஸ்டிக் காப்பீட்டு அட்டை எதிர்காலத்தில் நீக்கப்படவுள்ளது. அதற்குப் பதிலாக, இலங்கை காப்பீட்டு ஒழுங்குமுறை ஆணைக்குழுவின் தலையீட்டின் கீழ் உருவாக்கப்பட்ட புதிய நிரந்தர டிஜிட்டல் காப்பீட்டு அட்டையை வழங்குவதற்கான நடவடிக்கைகள் தற்போது முன்னெடுக்கப்பட்டு வருகின்றன.

வீதிகளில் காப்பீட்டு அட்டையைச் சரிபார்க்கும் பொலிஸ் அதிகாரிகள் உள்ளிட்ட பொலிஸ்மா அதிபர் சட்டத்தரணி பிரியந்த வீரசூரிய அவர்களும், சிரேஷ்ட பொலிஸ் அதிகாரிகளும் இப் புதிய நடைமுறை தொடர்பாக அறிவுறுத்தப்படுவதற்காக, பொதுமக்கள் பாதுகாப்பு அமைச்சும், இலங்கை காப்பீட்டு ஒழுங்குமுறை ஆணைக்குழுவும் இணைந்து ஏற்பாடு செய்த விசேட கூட்டம் ஒன்று 2026.01.07 அன்று மாலை, பொதுமக்கள் பாதுகாப்பு மற்றும் பாராளுமன்ற விவகார அமைச்சின் கேட்போர் கூடத்தில் நடைபெற்றது.

இக் கூட்டத்திற்கு கௌரவ பாராளுமன்ற விவகாரங்கள் மற்றும் பொதுமக்கள் பாதுகாப்பு அமைச்சர் திரு. ஆனந்த விஜயபால, கௌரவ பிரதி அமைச்சர் திரு. சுனில் வட்டகல, பொதுமக்கள் பாதுகாப்பு அமைச்சின் செயலாளர் திரு. ரவி செனவிரத்ன மற்றும் பொலிஸ்மா அதிபர் சட்டத்தரணி திரு. பிரியந்த வீரசூரிய ஆகியோர் தலைமையேற்று பங்கேற்றனர்.

இந்நிகழ்வில், இலங்கை காப்பீட்டு ஒழுங்குமுறை ஆணைக்குழுவின் தற்போதைய தலைவர் கலாநிதி அஜித் ரவீந்திர டி மெல் அவர்கள், புதிய டிஜிட்டல் காப்பீட்டு முறைமையின் நோக்கங்கள் மற்றும் அதனால் கிடைக்கும் நன்மைகள் குறித்து பிரதான உரையொன்றை நிகழ்த்தினார்.

தற்போது பயன்பாட்டிலுள்ள பிளாஸ்டிக் காப்பீட்டு அட்டைகள் ஆண்டுதோறும் காலாவதியாகி சுற்றுச்சூழலுக்கு ஏற்படுத்தும் பாதிப்புகள், புதிய அட்டைகளைத் தயாரிப்பதற்கான அதிக நிதிச் செலவுகள் மற்றும் காப்பீட்டுத் துறையில் அவ்வப்போது எழும் பல்வேறு சிக்கல்களைத் தீர்க்க இப் புதிய டிஜிட்டல் முறைமை உதவியாக அமையும் என அவர் பொலிஸ் அதிகாரிகளிடம் தெரிவித்தார்.

மேம்படுத்தப்பட்ட இலங்கை பொலிஸின் வீதி விபத்து தரவுகள் முகாமைத்துவ அமைப்பை எளிதாக பயன்படுத்துவதற்கும், புதிய டிஜிட்டல் காப்பீட்டு ஈ-அட்டையை நடைமுறைப்படுத்துவதற்கான தொழில்நுட்ப சாதனமாகவும், மேல் மாகாண போக்குவரத்து பொலிஸ் அதிகாரிகளுக்கு மொத்தமாக 500 டேப் கணினிகள் வழங்கும் திட்டம் ஆரம்பிக்கப்பட்டது. இதன் அடையாளமாக, நிகழ்வின் போது 150 டேப் கணினிகள் குறியீட்டு முறையில் பொலிஸ் அதிகாரிகளுக்கு வழங்கப்பட்டன.

இந்நிகழ்வில் இலங்கை காப்பீட்டு ஒழுங்குமுறை ஆணைக்குழுவின் பணிப்பாளர் நாயகம் திருமதி தமயந்தி பெர்னாண்டோ, இலங்கை பொலிஸின் நிர்வாகத்திற்கு பொறுப்பான சிரேஷ்ட பிரதிப் பொலிஸ்மா அதிபர் திரு. சஞ்சீவ தர்மரத்ன, இலங்கை காப்பீட்டு நிறுவனங்கள் சங்கத்தின் தலைவர் திரு. லசித விமரத்ன, காப்பீட்டு நிறுவனங்களின் உயர் அதிகாரிகள் உள்ளிட்ட சிரேஷ்ட அரச அதிகாரிகள் மற்றும் பொலிஸ் அதிகாரிகள் பலர் கலந்து கொண்டனர்.