ශ්‍රී ලාකිකයන්ට ඉන්දීය වීසා නොමිලයේ ලබාදීම ගැන සත්‍ය කතාව.

ඉන්දියාවේ වන්දනා චාරිකා සඳහා යන ශ්‍රී ලාංකිකයන්ගේ ඉන්දියානු වීසා සම්බන්ධයෙන් ඉන්දියානු මහකොමසාරිස් කාර්යාලය පැහැදිලි කිරීමක් සිදුකර ඇත. එම නිවේදනය පහතින් දක්වා ඇත.

සියලුම ශ්‍රී ලාංකිකයන් සඳහා කාලෝචිත හා සුමට ලෙස වීසා නිකුත් කිරීම පහසු කිරීම අපගේ ස්ථාවර ප්‍රතිපත්තියයි. ඉන්දියාවේ සංචාරය කිරීම සඳහා ඉලෙක්ට්‍රොනික වීසා (E-visa) පහසුකම ලබා ගත හැකි ලොව පුරා බොහෝ රටවල් අතරට ශ්‍රී ලංකාව ද ඇතුළත් වන බව සලකන්න. කෙසේ වෙතත්, මහ කොමසාරිස් කාර්යාලය හරහා අයදුම් කිරීමට තෝරා ගන්නා ශ්‍රී ලංකාවේ පුරවැසියන් අන්තර්ජාලය ඔස්සේ අයදුම් කළ යුතු අතර, කොළඹ, මහනුවර, යාපනය, හම්බන්තොට සහ මඩකලපුව යන ප්‍රදේශවල පිහිටා ඇති ඉන්දියානු කොන්සියුලර් අයදුම්පත් මධ්‍යස්ථාන (ICAC) වෙත තම අයදුම්පත් භාර දිය යුතුය.

බෞද්ධ වන්දනා ස්ථාන ඇතුළුව ඉන්දියාවේ වන්දනා චාරිකා සඳහා යන ශ්‍රී ලාංකිකයන් සඳහා වීසා පහසුකම් ඉතා ඉක්මනින් සලසා දෙනු ලැබේ. හැකි සෑම විටම, මෙම අයදුම්පත් බුද්ධශාසන, ආගමික හා සංස්කෘතික කටයුතු අමාත්‍යාංශය මගින් නිර්දේශ කරනු ලබන්නේ නම්, වන්දනාකරුවන් 10 දෙනෙකු හෝ ඊට වැඩි කණ්ඩායම් සඳහා නොමිලේ (Gratis basis) වීසා නිකුත් කරනු ලැබේ.
ඉන්දියානු මහ කොමසාරිස් කාර්යාලය වෙනුවෙන් සේවය කරන වීසා බාහිර සේවා නියෝජිතායතනයේ සිදු වූ වෙනසක් හේතුවෙන් කෙටි කාලයකට මෙම ක්‍රියාපටිපාටිය අත්හිටුවා තිබුණි. 2026 ජූලි 07 වන දින සිට වැඩ ආරම්භ කරන ලද නව සේවා සපයන්නා තේරී පත්වීමෙන් පසුව, වන්දනා චාරිකා සඳහා යන ශ්‍රී ලාංකිකයන් සඳහා නොමිලේ වීසා නිකුත් කිරීමේ ක්‍රමය නැවත හඳුන්වා දෙනු ලැබේ. පූර්වයෙන් පැවති ක්‍රියාපටිපාටියට අනුව, මෙම ඉල්ලීම් බුද්ධශාසන, ආගමික හා සංස්කෘතික කටයුතු අමාත්‍යාංශය මගින් යොමු කළ යුතුය. මෙම වීසා බලපත්‍ර 10 දෙනෙකු හෝ ඊට වැඩි කණ්ඩායම් ලෙස අයදුම් කළ හැකි අතර, අයදුම්කරුවන්ගේ ජෛවමිතික දත්ත (biometrics) සටහන් කර ගැනීම සඳහා ඔවුන්ගේ පහසුව අනුව කණ්ඩායමක් ලෙස හෝ තනි තනිව ICAC වෙත පැමිණිය යුතුය. මෙය ඉන්දීය රජයේ නව රෙගුලාසි යටතේ අනිවාර්ය අවශ්‍යතාවයකි. කෙසේ වෙතත්, ජෛවමිතික දත්ත ලබා ගැනීම අවශ්‍ය වන්නේ වයස අවුරුදු 12 ත් 70 ත් අතර පුද්ගලයන් සඳහා පමණි.

ජෛවමිතික දත්ත ලබා දීම සඳහා ICAC වෙත පැමිණෙන අනෙකුත් ජ්‍යෙෂ්ඨ පරපුරේ පුරවැසියන් සඳහා, ඔවුන්ගේ රැඳී සිටින කාලය අවම කර ගැනීම සඳහා විශේෂ සහ කඩිනම් ක්‍රියාවලියක් ස්ථාපිත කර ඇත. ජෛවමිතික දත්ත ලබා ගැනීම මගින් ඔවුන් ඉන්දියාවට පැමිණීමේදී ඉන්දියානු ආගමන විගමන කටයුතු සුමටව සහ පහසුවෙන් සිදු වන බව තහවුරු කෙරේ.

එබැවින්, ඉහත සඳහන් කළ පරිදි අයදුම්පත් භාරදෙන ශ්‍රී ලාංකික වන්දනාකරුවන් සඳහා වීසා ගාස්තුවක් අය නොකෙරේ. එම නිසා, ශ්‍රී ලාංකික වන්දනාකරුවන් සඳහා වීසා ගාස්තුවේ යම් වෙනසක් සිදුව තිබේද යන්න පිළිබඳ ප්‍රශ්නයක් මතු නොවේ. කෙසේ වෙතත්, අයදුම්කරුවන් ICAC මධ්‍යස්ථානයේ සේවාවන් වෙනුවෙන් රුපියල් 1855/- ක වීසා සේවා ගාස්තුවක් ගෙවීමට සිදු වේ.

උපුටාගැනීම අවසන්…