Post Views: 274 ශ්රී ලංකා පරිපාලන සේවයේ විශේෂ ශ්රේණියේ ජ්යෙෂ්ඨ නිලධාරියෙකු වන අනුරාධ විජේකෝන් මහතා පසුගියදා (10) ශ්රී ලංකා පදනමේ නව සභාපතිවරයා ලෙස නිල වශයෙන් වැඩ භාරගන්නා ලදී. වසර 30 කට අධික කාලයක් පුරා රාජ්ය පරිපාලනය, ආයතන කළමනාකරණය, ප්රතිපත්ති සංවර්ධනය සහ සංවිධාන නායකත්වය ඇතුළු ක්ෂේත්ර රැසක අත්දැකීම් ලබා ඇති විජේකෝන් මහතා, රාජ්ය සේවයේ විවිධ ජ්යෙෂ්ඨ තනතුරු රැසක කටයුතු කර තිබේ. ඔහු ක්රීඩා හා යෞවන කටයුතු අමාත්යාංශයේ ලේකම්වරයා ලෙස මෙන්ම ශ්රී ලංකා මහවැලි අධිකාරියේ අධ්යක්ෂ ජනරාල්වරයා ලෙසද සේවය කර ඇත. එමෙන්ම අධ්යාපන, ආරක්ෂක, මහාමාර්ග, වරාය හා නාවික කටයුතු සහ රාජ්ය පරිපාලන යන අමාත්යාංශ ඇතුළු ප්රධාන රාජ්ය ආයතන කිහිපයක අතිරේක ලේකම්වරයෙකු ලෙසද ඔහු කටයුතු කර තිබේ. රාජ්ය අංශයේ ප්රතිසංස්කරණ, පරිපාලන හා මූල්ය කළමනාකරණය, ප්රසම්පාදන හා ඉදිකිරීම්, ආයතන සංවර්ධනය, මානව සම්පත් කළමනාකරණය මෙන්ම ප්රතිපත්ති සම්පාදනය හා ක්රියාත්මක කිරීම සම්බන්ධයෙන්ද විජේකෝන් මහතාට පුළුල් අත්දැකීම් පවතී. ජාතික මට්ටමේ ආයතන හා වැඩසටහන් රැසක් සම්බන්ධීකරණය කරමින් ඒවායේ ආයතනික පද්ධති ශක්තිමත් කිරීම සහ කාර්යක්ෂමතාව ඉහළ නැංවීම සඳහාද ඔහු දායක වී තිබේ. විජේකෝන් මහතා කොළඹ විශ්වවිද්යාලයෙන් වාණිජවේදී උපාධියක් (B.Com) සහ ව්යාපාර අධ්යයනය පිළිබඳ ශාස්ත්රපති උපාධියක් (MBS) ලබා ඇති අතර, රාජ්ය පරිපාලනය, සාමාන්ය කළමනාකරණය සහ ජ්යෙෂ්ඨ රාජ්ය නිලධාරීන් සඳහා ධාරිතා සංවර්ධනය සම්බන්ධ වෘත්තීය සුදුසුකම්ද හිමිකරගෙන ඇත. ඔහු සිය වෘත්තීය ජීවිතය තුළ පුහුණුකරුවෙකු, උපදේශකයෙකු මෙන්ම විවිධ මණ්ඩල, සභා සහ වෘත්තීය කමිටුවල සාමාජිකයෙකු ලෙසද කටයුතු කර තිබේ. ජාතික හා ජාත්යන්තර මට්ටමේ පුහුණු වැඩසටහන් සඳහා සහභාගී වීම තුළින් නායකත්වය, ආයතන සංවර්ධනය සහ රාජ්ය අංශ කළමනාකරණය පිළිබඳ ඔහුගේ දැනුම සහ අත්දැකීම් තවදුරටත් පුළුල් වී තිබේ. ශ්රී ලංකා පදනමේ සභාපති ධුරයට පත්වීමත් සමඟ ඔහුගේ දීර්ඝකාලීන රාජ්ය සේවා අත්දැකීම් සහ උපායමාර්ගික නායකත්වය ඔස්සේ පදනමේ ආයතනික සංවර්ධනය තවදුරටත් ශක්තිමත් කිරීමට හැකිවනු ඇතැයි අපේක්ෂා කෙරේ. එමෙන්ම ජාතික ධාරිතා සංවර්ධනය, අධ්යාපනය, පුහුණුව සහ සමාජ සංවර්ධනය සඳහා ශ්රී ලංකා පදනම දක්වන දායකත්වය තවදුරටත් පුළුල් කිරීම කෙරෙහිද ඔහුගේ නායකත්වය යටතේ අවධානය යොමුවනු ඇතැයි බලාපොරොත්තු වේ. Post navigation වසර 19කට පසු හයිටි චෝදනා යළි කරළියට: 1,132 ක ශ්රී ලංකා බලකාය ගැන මානව හිමිකම් ප්රශ්න.
