Post Views: 290 චීනයේ හොංකොං නුවර පැවැති 14 වන ආසියානු නෙට්බෝල් ශූරතා තරගාවලියට සහභාගී වී එහි තෙවන ස්ථානය හිමිකරගත් ශ්රී ලංකා කණ්ඩායම ඊයේ රාත්රී (16) කටුනායක ගුවන් තොටුපොළ වෙත පැමිණි අතර කණ්ඩායම පිළිගැනීම සඳහා ශ්රී ලංකා නෙට්බෝල් ෆෙඩරේෂනයේ සහ ක්රීඩා අමාත්යාංශයේ නිලධාරීන් මෙන්ම ක්රීඩිකාවන්ගේ දෙමාපියන් ද එක්ව සිටියහ. පිට පිට ආසියානු ශූරතා හතක අවසන් තරගයට සුදුසුකම් ලැබූ ශ්රී ලංකා නෙට්බෝල් කණ්ඩායමට, 14 වැනි ආසියානු නෙට්බෝල් ශූරතාවේ අවසන් පූර්ව තරගයේදී සිංගප්පූරුව හමුවේ ලකුණු 54-82 ක පරාජයක් අත්වීමත් සමඟ වසර 21 කට පසු අවසන් තරගය අහිමි විය. ඉන් අනතුරුව මලයාසියාව සමග තෙවන ස්ථානය සදහා තරග වැදුනු ශ්රී ලංකා කණ්ඩායම ලකුණු 65-60 ක් ලෙසට තියුණු තරගයකින් පසු තෙවැනි ස්ථානය දිනාගනිමින් ලෝකඩ පදක්කම ලබාගන්නා ලදී. 14 වැනි ආසියානු නෙට්බෝල් ශූරතාවයට කණ්ඩායම තේරීමේ මොහොතේ පටන් සිය වගකීම නිසි පරිදි ඉටුනොකරමින් නවක ක්රීඩිකාවන්ට නොයෙකුත් කෙනෙහිලිකම් කල ජාතික පුහුණුකාරිනීය මෙම පරාජයේ වගකීම භාර ගතයුතු බව ක්රිඩා විචාරකයින්ගේ මතයයි. විශේෂයෙන්ම, මෙවර තරගාවලියට නම් කරන ලද ක්රීඩිකාවන් 12 දෙනා අතරට එක්ව සිටි එකම පාසල් ක්රීඩිකාව වන මලියදේව බාලිකා ජාතික පාසලේ 18 හැවිරිදි ක්රීඩිකා තුමල්කා ඒකනායක ඉවත් කර ගැනීමට කණ්ඩායමේ පුහුණුකාරිය පළමු තේරීම් පරීක්ෂණයේ සිට ගත් උත්සාහයන් ව්යාර්ථ වී ගිය බව බොහෝ දෙනෙකු සදහන් කරයි. තුමල්කා වෙනුවට වෙනත් ක්රීඩිකාවක් ලබාදෙන ලෙස පුහුණුකාරිණිය කල ඉල්ලීම ප්රතික්ෂේප කල තේරීම් කමිටු සභාපති පද්මා බැද්දවල මහත්මිය සදහන් කර ඇත්තේ, “තුමල්කා ඒකනායක ශ්රී ලංකා නෙට්බෝල් කණ්ඩායමේ සිටිය යුතුම ක්රීඩිකාවක්, කණ්ඩායමේ අනාගතය සකස් කිරීමේ අදහසින් තිසලා අල්ගමට පසු කණ්ඩායමේ සිටින උසම ක්රීඩිකාව ලෙස තුමල්කා තෝරා ගත්තා. එහෙම දක්ෂ දරුවෙක් කපන්න බෑ.” යනුවෙනි. දක්ෂ මලල ක්රීඩිකාවක් මෙන්ම බැට්මින්ටන් ක්රීඩිකාවක් ද වන අඩි 6 අඟල් 2 ක් උසැති තුමල්කා උසින් දෙවැනි වන්නේ කණ්ඩායමේ නායිකා තිසලා අල්ගමට පමණි. එහෙත් දක්ෂතා අතින් ඇය පලපුරුදු ක්රීඩිකාවන්ට කිසිසේත්ම නොදෙවෙනි බව තේරීම් කමිටුවේ සාමූහික මතය විය. එමෙන්ම, ඇය මයිලෝ නෙට්බෝල් තරගාවලියේදී මෙන්ම මේ වසරේ පවත්වන ලද ඊවා නෙට්බෝල් තරගාවලියේදී ද දක්ෂතම ක්රීඩිකාව ලෙසත් සම්මාන දිනා තිබුණි. එවන් දක්ෂතා සහිත පසුබිමක් ඇති ඇය ජාතික කණ්ඩායම් පුහුණුකාරියගේ කෙනහිලිකම් මැද කෙසේ හෝ කණ්ඩායමත් සමග හොංකොං ගිය නමුත් ඇයගේ දක්ෂතා වලින් නිසි ප්රයෝජනයක් ගැනීමට පුහුණුකාරිණියට කිසිදු උවමනාවක් නොතිබූ බව හොදින්ම පෙනුනි. මෙවර ආසියානු නෙට්බෝල් ශූරතාවලියට ශ්රී ලංකා නෙට්බෝල් පිල පිටත්ව යෑමේදී ක්රීඩිකාවන් පිළිබඳ මතභේදයක් පුහුණුකාරිනි සොමිතා ද අල්විස් මහත්මිය හා ශ්රී ලංකා නෙට්බෝල් සංගමය අතර පැනනැඟී තිබූ අතර, අවසානයේ වෛද්ය වාර්තා ගැටලුවකට ද ක්රීඩා අමාත්යාංශය මැදිහත් විය. තරගාවලියට පෙර ජ්යෙෂ්ඨ ක්රීඩිකාවන් කිහිපදෙනකුම ක්රීඩා ඇමැති සුනිල් කුමාර ගමගේ මහතා හමුවී යම් යම් ගැටළු ඉදිරිපත් කළ බවත් වාර්තා විය. ශ්රී ලංකා පිල අවසන් වරට පැවති 2024 ආසියානු නෙට්බෝල් ශූරතාවලියේ අවසන් මහා තරගයේදී සිංගප්පූරුවට පරාජය වී අනුශූරතාව දිනාගත් අතර, 2022 තරගාවලියේදී සිංගප්පූරුව පරදවා ශූරතාව දිනා ගැනීමට සමත් විය. ආසියානු නෙට්බෝල් ශූරතාවලියේ තෙවැනි ස්ථානයට පත්වූ ශ්රී ලංකා පිල ඊයේ (16) රාත්රියේ ශ්රී ලංකාවට පැමිණී අවස්ථාවේ මාධ්යය වෙත අදහස් දැක්වූ, ශ්රී ලංකා නෙට්බෝල් සම්මේලනයේ ලේකම් දමයන්ති ජයතිලක සදහන් කලේ, ක්රීඩිකාවන් අතර පැවති අසමගිය මෙවර පරාජයට ප්රධානතම හේතුව වූ බවයි. කෙසේ වෙතත්, මෙම පරාජයත් සමග ශ්රි ලංකාවට වර්ෂ 2027 සිඩ්නි හි පැවැත්වෙන ලෝක නෙට්බොල් ශුරතාවය ද අහිමි වී තිබේ. වසර 21 කට පසුව කණ්ඩායම ලද මෙම පසුබෑම සම්බන්ධව අදහස් දැක්වූ ජාතික පුහුණුකාරිනී සොමිතා අල්විස් ප්රකාශ කරන ලද්දේ, මෙවර පරාජයේ වගකීම තමා භාර ගන්නා බවයි. කෙසේ වෙතත් කවුරුන් වගකීම බාරගත්තද මෙසේ බිදවැටෙන්නේ මෙරට ක්රීඩාව බව ක්රීඩිකාවන් මෙන්ම පරිපාලනයද තේරුම්ගත යුතුය. නෙට්බෝල් පමණක් නොව ඕනෑම ක්රීඩාවක ජීව ගුණය රදා පවතින්නේ එකමුතුකම, සහයෝගය මෙන්ම අනෙකාට ගරුකිරීම ආදී ගුණාංග රැකගතහොත් පමණක් බව සියල්ලන්ම අවධාරණය කරගත යුතුය. Post navigation හෙල්ල විසි කිරීමේ ක්රීඩක රුමේෂ් තරංගට සැරයන් නිලයට උසස්වීමක්.
