ක්‍රිකට් ක්‍රීඩාව සම්බන්ධයෙන් ක්‍රීඩා අමාත්‍යවරයාගෙන් විශේෂ ප්‍රකාශයක්.

ශ්‍රී ලංකා ක්‍රිකට් ක්‍රීඩාව යළි ගොඩනැංවීම සඳහා එහි පරිපාලනය අතුරු කමිටුවකට පැවරීම සම්බන්ධයෙන් ජාත්‍යන්තර ක්‍රිකට් කවුන්සිලය (ICC) සමඟ සාකච්ඡා පවත්වමින් සිටින බව තරුණ කටයුතු හා ක්‍රීඩා අමාත්‍ය සුනිල් කුමාර ගමගේ මහතා ප්‍රකාශ කළේය.

අමාත්‍යවරයා මේ බව පැවසුවේ අද (05) දින අමාත්‍යාංශයේ පැවැති විශේෂ මාධ්‍ය හමුවකදීය. මෙරට ක්‍රිකට් ක්‍රීඩාව නංවාලීම සඳහා ජනාධිපතිවරයා ද මැදිහත් වී ඇති බව ඔහු වැඩිදුරටත් සඳහන් කළේය.

ඒ අනුව, මේ සම්බන්ධයෙන් වන අදාළ සාකච්ඡා මේ වන විට ICCය සමඟ පවත්වමින් පවතින බවත්, එම සාකච්ඡා සඳහා ජනාධිපතිවරයා ද සහභාගී වන බවත් අමාත්‍යවරයා සඳහන් කළේය.

මෙහිදී අමාත්‍යවරයා අවධාරණය කළේ ඉදිරි ක්‍රියාමාර්ග ගනු ලබන්නේ ICCයේ එකඟතාව මත බවයි. ශ්‍රී ලංකා ක්‍රිකට් ක්‍රීඩාව තහනමකට ලක්වීමේ අවදානමක් ගනිමින් ක්‍රීඩාව දියුණු කළ නොහැකි බවත්, එබැවින් ක්‍රීඩාවේ ආරක්ෂාව තහවුරු කරන අතරම එය සංවර්ධනය කිරීමට අවධානය යොමු කර ඇති බවත් ඔහු පැවසීය.

ක්‍රිකට් ක්‍රීඩාව නංවාලීම සඳහා වන සැලසුම් මේ වන විටත් කෙටුම්පත් කර ඇති අතර, පියවර කිහිපයක් දැනටමත් ගෙන ඇති බවත්, ඉදිරි සැලසුම් කඩිනමින් ක්‍රියාත්මක කරන බවත් ඔහු සඳහන් කළේය.

ක්‍රිකට් ක්‍රීඩාව යළි ගොඩනැංවීමේ වගකීම රජය භාරගෙන ඇති අතර එම වගකීම වෙනත් කිසිවෙකු මත පැටවිය නොහැකි බව ද අමාත්‍යවරයා පැවසීය.

අවසාන වශයෙන්, මෙම කාලසීමාව තුළ ක්‍රීඩකයින්ට අපහාස වන අන්දමේ හෝ අගෞරවනීය ප්‍රකාශ කිරීමෙන් වළකින ලෙස අමාත්‍යවරයා මහජනතාවගෙන් කාරුණික ඉල්ලීමක් කළේය.