මූලික ඉස්ලාම් ආගමික අධ්‍යයන පාඨමාලාවේ 4 අදියර සාර්ථකව නිමාකෙරේ.

සම් සම් පදනම වෙතින් පවත්වන ලද මූලික ඉස්ලාම් ආගමික අධ්‍යයන පාඨමාලාවේ සමාප්තිය අද(15) දෙහිවල පිහිටි සම් සම් පදනම මූලස්ථාන ශ්‍රවණාගාරයේදී පැවැත්වුණි.

දශක කිහිපයක සිට මෙරට සාමය සහ ජීවනය වෙනුවෙන් ජාති බේදයකින් තොරව කැපවී විවිධ සමාජ සත්කාරක කටයුතු ඉටු කරන සම් සම් ආයතනය මෙම මූලික ඉස්ලාම් අධ්‍යයන පාඨමාලාව පවත්වනුයේ සම්පූර්ණයෙන්ම නොමිලයේය.

මෙවර පාඨමාලාව හැදෑරීම සදහා රාජ්‍ය නිළධාරීන්, මාධ්‍යවේදීන්, ව්‍යවසායකයින්,සමාජ ක්‍රියාකාරිකයන් සහ විශ්ව විද්‍යාල සිසුන් ඇතුළු විවිධ පාර්ශව ගණනාවක පිරිස් සහභාගී වන ලදී.

සමාප්ති අවස්ථාව සදහා ප්‍රධාන ආරාධිතයා ලෙස සහභාගී වූ සම් සම් පදනමේ සභාපති ආෂ් ශේක් අල් මුෆ්ති යූසුප් හනීෆා මහතා අදහස් දක්වමින් හැම දෙනාම පළමුව තම පවුල ආරක්ෂාකරමින් කටයුතු කලයුතු බවත් එවිට අපට සුන්දර රටක් ගොඩනැංවිය හැකි බවත් පැවසීය. එමෙන්ම බොහෝ තනතුරු දරන්නන්ට එම තනතුරු හැර යාමෙන් පසුව හිටපු යන පදය භාවිතා කලද පවුලක මවට , පියාට හෝ දරුවන්ට හිටපු යන වචනය භාවිතා නොකරන්නේ පවුල් සංස්ථාවේ ඇති වැදගත්කම නිසාම බවත් සදහන් කරන ලදී.

මෙහිදී අදහස් දැක්වූ අධිකරණ හා ජාතික ඒකාබද්ධතා අමාත්‍යාංශයේ ජාතික ඒකාබද්ධතා නිලධාරි ඒ.කේ. අංජානි දිනුෂිකා සෙනෙවිරත්න මිය මෙම පාථමාලාවේ ලද අත්දැකීම් සහ වැදගත්කම පෙන්වා දෙන ලදී. මාස 5 කට ආසන්න කාලයක් පැවති මෙම පාඨමාලාවේදී මුස්ලිම් ප්‍රජාවේ සමාජ ආර්ථික කටයුතු පිළිබදව මනා දැනීමක් ලබාදීම සදහා පාඨමාලාව හැදෑරූවන් ක්‍රේෂ්ත්‍ර චාරිකාවන්ද රැගෙන යාම සිදුකර ඇත.